على طريقة آلاء وتوجيهات الرئيس!

"مرة واحد زعيم عايز يزود شعبيته فقال لرئيس الوزراء يعلِّي الأسعار فالناس تتضايق يقوم هو ينزلها ويقول لهم ده كرم من الرئيس علشان خاطر الشعب، فعلاً رئيس الوزراء زود الأسعار، بس الناس ما اتكلمتش، عادي خالص، الزعيم استغرب قوي، وقاله: طب خلي الضرايب على المرتبات خمسين المية. زود رئيس الوزراء الضرايب خمسين فى المية، الناس هزت دماغها وسكتت.
الزعيم اتجنن وقال لرئيس الوزرا بص، طلع أي قرار غشيم من عندك يخلي البلد تولع، رئيس الوزرا عمل ضريبة اللي يعدي كوبري يدفع عشرة جنيه، الناس نفخت وضربت كف بكف ودفعوا، فقام رئيس الوزرا خلى اللي يعدي يدفع عشرة جنيه وهو طالع، وعشرة جنيه وهو نازل من الناحية التانية، الناس قالت اللهم طولك يا روح وأمرنا لله ودفعوا.
رئيس الوزرا كبرت فى دماغه، وأمر إن اللي يعدي بعد ما يدفع عشرة جنيه، وهو خارج من الكوبري ياخد على قفاه، ونزل الزعيم بنفسه متنكرا يتابع الموقف، الناس تدفع وهي طالعة الكوبري عشرة جنيه، وعشرة جنيه وهي نازلة وتاخد على قفاها وتمشي، شوية ولقى واحد بيزعق ومتضايق، وطى على ودنه قال له "مالك؟" قال له "حاجة تقرف! أنا متعطل هنا بقالي خمس ساعات.. ما ينفعش كده.. لازم يزودوا الناس اللي بتدينا على قفانا!!!!!!!"
دي المفروض كانت نكتة بس هي أحسن حاجة ممكن توصف حالنا... هو مجرد سؤال لغاية امتى هنفضل كده؟؟ إذا كانت الفيزياء وقوانين الطبيعة بتقول إن البخار تحت الضغط العالي بينفجر لأنه بيكون زهق ونظرية "حلة البرستو" المشهورة بإن الكبت بيولد الانفجار كل دول بيأكدوا إن الجماد تحت الضغط بينفجر ويثور.. بس للأسف عندنا أكبر مقومات الكبت لكن بنقابل ده بابتسامة عريضة بلهاء.
يمكن ناس تقول إن احنا شعب مسالم وبتاع وإن نهر النيل علمنا الاستقرار والقعدة جنب الزرعة والجاموسة وتعليلات يمكن فيها شئ من الصحة وشيء من الخطأ. الثورة في الزمن ده مش ثورة الدانة والمدفع... الثورة مش انقلاب عسكري على الطريقة العربية المعهودة اللي بتولد أنظمة القمع.. الثورة ثورة الفكر والكلمة... إيمان الناس ببكره واجتثاث – مش عارف إيه اللي جابها في النص دى بس برضه حتة علشان سيبويه- اليأس من نفوسنا... لو هنفكر في الواقع والأرقام والاحصائيات يبقى احنا رايحين في داهية. يمكن هناك شواهد مبشرة ولكن الرهان كله على الأمل والحلم اللي جوانا كشعب.. للأسف مبقاش فيه حلم يجمعنا كلنا... الحكومة في حتة والناس في حتة والمثقفين في حتة تانية أصلا. والنتيجة الناس كلها عارفاها...
المشكلة مش في النظم الحاكمة قد ما هي في أيديولوجية الشعب وسلوكه... الدولة عليها دور كبير لكن الناس دي ما هي إلا نتاج لينا ولمجتمعنا...كلنا بنقعد نقول "لا للواسطة والكوسة" لكن مافيش مانع إني أشوف لي واحد علشان البطاقة أو الرخصة... نطلع مظاهرة نقول "لن نفرط في حق رسول الله من أجل الزبد والجبن" وكأن الشعب غرقان في ال"لورباك" والـ"فيتراك" وبرضه مافيش مانع إنه يتحرش بواحدة في وسط البلد!
في النهاية هناك أصنام كتير في حياتنا زى السلبية والمحسوبية والموروثات الغلط... حاجات كتير لازم نكسرها كل واحد لازم يمسك فأسه ويبدأ يكسر لكن دي مجرد البداية وبعديها لازم نستخدم اللي اتهد من الصنم علشان نبني دار العبادة والمصنع والمدرسة وبكره... ساعتها نقدر نقول احنا أولاد الهرم وأبو الهول والكلام الكبير ده علشان ساعتها هنكون عندنا حضارة في حاضرنا مش مجرد ماض وبس.... يا لا سلام بقى علشان دوري في القفا خلاص قرب.... أنا جاااااااااااااااااي!